काठमाडौं, वैशाख १८ – नेपाल शिक्षक महासंघले शिक्षा ऐनसँग सम्बन्धित आफ्ना मागहरू पुरा गराउनका लागि जारी आन्दोलनलाई अझ सशक्त बनाउन शिक्षकहरूलाई अपिल गरेको छ। बुधबार बिहान मध्यबानेश्वरस्थित रत्नराज्यलक्ष्मी माध्यमिक विद्यालयमा बसेको महासंघको बैठकले आन्दोलनलाई थप प्रभावकारी बनाउने निर्णय गरेको हो।
बैठकपछि महासंघकी सहअध्यक्ष नानुमाया पराजुलीले आन्दोलन कमजोर भए वार्तामा सरकारको धारणा बलियो हुन सक्ने चेतावनी दिँदै सबैलाई सक्रिय सहभागिता जनाउन आग्रह गरिन्। “आजको आन्दोलन कमजोर भयो भने वार्तामा हामीलाई कमजोर बनाउन सक्छन्। त्यसैले आन्दोलनमा सबै सहभागी हुनुहोला,” उनले भनिन्।
शिक्षकहरूले गत चैत २० गतेदेखि काठमाडौंको माइतीघरदेखि बानेश्वर क्षेत्रसम्म सडक आन्दोलनलाई निरन्तरता दिँदै आएका छन्। उनीहरू विगतमा सरकारसँग भएका सहमतिहरूलाई समेटेर नयाँ शिक्षा ऐन ल्याउन माग गर्दै आएका छन्।
महासंघका अनुसार विभिन्न चरणमा सरकारले वार्ताका लागि पहल गरे पनि ठोस सहमति बन्न सकेको छैन। शिक्षकहरू भने आफूहरूको हक, हित र पेशागत सुरक्षा सुनिश्चित नभएसम्म आन्दोलन नरोकिने अडानमा छन्।
महासंघले सबै शिक्षकहरूलाई एकताबद्ध भई आन्दोलनमा सहभागी भइ माग पुरा गराउन जोड दिन आग्रह गरेको छ। साथै, शिक्षा ऐन शिक्षकमैत्री र न्यायोचित हुनुपर्ने माग पनि उसले दोहोऱ्याएको छ।
आन्दोलनको स्वरूप अझ व्यापक बनाउने तयारीमा रहेको महासंघले आगामी दिनमा अन्य संगठनहरूसँग समन्वय गर्दै दबाब सृजना गर्ने योजना पनि बनाएको छ।
शिक्षकहरू आन्दोलनमा उत्रिएपछि विद्यालयको शैक्षिक क्रियाकलापमा असर परेको छ। तर उनीहरू भन्छन्, “हाम्रो आन्दोलन शिक्षाको गुणस्तरका लागि हो, यसले दीर्घकालीन रूपमा सकारात्मक असर पार्नेछ।”
शिक्षा क्षेत्रका सरोकारवालाहरूले सरकार र शिक्षकबीच शीघ्र संवाद तथा सहमति खोज्न आग्रह गरेका छन्।
