काठमाडौं, वैशाख ३० – काभ्रेपलाञ्चोक जिल्लाको पनौती क्षेत्रमा सोमबार अपराह्न आएको बाढीले एक महिलालाई बगाएको छ। हालसम्म ती महिलाको अवस्था अज्ञात रहेको जिल्ला प्रहरी कार्यालय काभ्रेले जनाएको छ। सुरक्षाकर्मीहरूले खोजी कार्य जारी राखेका छन्।
बेपत्ता भएकी महिला पनौती नगरपालिका–५ सुब्बागाउँकी २८ वर्षीया रेनुका गिरी रहेको प्रहरीले पुष्टि गरेको छ। सोमबार बाढीपछि प्रारम्भ गरिएको खोजी कार्य साँझपछि रोकिएको थियो भने मंगलबार बिहानैदेखि पुनः सुरु गरिएको छ।
प्राकृतिक विपत्तिका कारण पनौती, कटुन्जेबेसी, बोक्सीकुना र माम्ती क्षेत्रमा संरचनात्मक र यातायातजन्य क्षति पुगेको छ। विशेषतः रोशी गाउँपालिका–११ र १२ को सिमानामा पर्ने माम्ती खोलामा आएको बाढीले डाइभर्सन बगाएपछि बीपी राजमार्ग दुवैतर्फ अवरुद्ध भएको छ।
गत असोज महिनामा आएको बाढीले यही क्षेत्रमा सडक बगाएपछि ह्युमपाइप राखेर अस्थायी सडक सञ्चालनमा ल्याइएको थियो। तर, सोमबारको बाढीले त्यो अस्थायी संरचना समेत बगाएपछि यातायात पूर्ण रूपमा अवरुद्ध भएको हो।
हाल उक्त क्षेत्रमा बिहानैदेखि बाटो मर्मतको काम जारी रहेको काभ्रे प्रहरी कार्यालयले जनाएको छ। सडक अवरुद्ध भएपछि पूर्वबाट काठमाडौं आउने सवारीलाई खुर्कोट र नेपालथोकमा रोकिनु परेको छ भने काठमाडौंबाट बाहिरिने सवारीलाई भकुण्डेबेसीमा थुनिएको छ।
स्थानीय बासिन्दा बाढीका कारण दैनिक आवागमनमा समस्या भोगिरहेका छन् भने यात्रुहरू लामो समयदेखि बाटो खुल्ने प्रतिक्षामा छन्। बाढी प्रभावित क्षेत्रमा सुरक्षाकर्मी र प्राविधिक टोली परिचालन गरिएको छ।
