काठमाडौँ, १५ जेठ — नेपाल आयल निगम लिमिटेडले पेट्रोलियम पदार्थको मूल्यमा कटौती गरेको छ। बिहीबार राती १२ बजेदेखि लागू हुनेगरी निगमले पेट्रोल, डिजेल र मट्टितेलको मूल्य घटाएको हो।
निगमका अनुसार पेट्रोलको मूल्य प्रतिलिटर १ रुपैयाँले घटाइएको छ भने डिजेल र मट्टितेलको मूल्य प्रतिलिटर ३ रुपैयाँले घटाइएको छ। नयाँ मूल्य आज रातिदेखि देशभरका सबै निगम स्वीकृत पेट्रोल पम्प तथा डिपोहरूमा लागू हुनेछ।
निगमका प्रवक्ता शनिबार चौधरीका अनुसार इण्डियन आयल कर्पोरेशन (IOC) बाट बिहीबार दिउँसो नयाँ मूल्य सूची प्राप्त भएपछि नेपालमा समेत मूल्य समायोजन गरिएको हो। “हामीले भारतीय बजारमा आएको परिवर्तनलाई ध्यानमा राखी स्वचालित मूल्य प्रणाली अन्तर्गत समायोजन गरेका हौं,” उनले भने।
नयाँ मूल्य अनुसार अब काठमाडौँ उपत्यकालगायत देशभर पेट्रोलको मूल्य प्रतिलिटर १६८ रुपैयाँ, डिजेल र मट्टितेलको मूल्य प्रतिलिटर १५४ रुपैयाँ कायम हुनेछ।
निगमले अन्तर्राष्ट्रिय बजारमा कच्चा तेलको मूल्यमा आएको गिरावट र भारतीय आपूर्तिकर्ताको संशोधित मूल्यका आधारमा मूल्य समायोजन गरिएको स्पष्ट पारेको छ। पछिल्लो समय मूल्यवृद्धिका कारण आलोचना भोगिरहेको निगमले उपभोक्तालाई केही राहत दिने उद्देश्यले मूल्य समायोजन गरेको जनाएको छ।
पेट्रोलियम पदार्थको मूल्यवृद्धिले खाद्यान्नदेखि यातायातसम्मको लागतमा असर गर्ने भएकाले यो कटौतीले दैनिक उपभोग्य वस्तुहरूको मूल्यमा समेत केही राहत आउने अपेक्षा गरिएको
