काठमाडौं, जेठ ६ – नेपाल राष्ट्र बैंकको नेतृत्वमा नयाँ गभर्नरको आगमन भएको छ। मंगलबार साँझ बसेको मन्त्रिपरिषद् बैठकले प्रा.डा. विश्वनाथ पौडेललाई राष्ट्र बैंकको १८औं गभर्नरको रूपमा नियुक्त गरेको छ।
यस निर्णयसँगै राष्ट्र बैंकमा केही समयदेखि देखिएको नेतृत्वको अन्योल अन्त्य भएको छ। गभर्नर नियुक्तिका सन्दर्भमा उत्पन्न राजनीतिक खिचातानी र सत्ता गठबन्धनभित्रको असमझदारी समेत केही हदसम्म समाधान भएको देखिएको छ।
गभर्नर चयनका लागि उपप्रधानमन्त्री तथा अर्थमन्त्री विष्णु पौडेलको संयोजकत्वमा गठित सिफारिस समितिले मंगलबार नै तीनजनाको नाम मन्त्रिपरिषदमा पेश गरेको थियो। तीमध्ये कार्यवाहक गभर्नर नीलम ढुंगाना, पूर्वसचिव दिनेश भट्टराई र डा. विश्वनाथ पौडेलको नाम समावेश थिए। पौडेलको नाम सिफारिस सूचीमा पहिलो स्थानमा थियो।
अर्थशास्त्रमा पीएचडी गरेका डा. पौडेल विभिन्न राष्ट्रिय तथा अन्तर्राष्ट्रिय निकायहरूमा आर्थिक सल्लाहकारको रूपमा काम गरिसकेका छन्। उनी योजना आयोगको उपाध्यक्ष, अर्थ मन्त्रालयका सल्लाहकार तथा काठमाडौं विश्वविद्यालयका प्राध्यापकसमेत रहिसकेका छन्।
गएको चैत २४ गतेदेखि रिक्त रहेको राष्ट्र बैंकको गभर्नर पदमा अब डा. पौडेलले जिम्मेवारी सम्हाल्नेछन्। राष्ट्र बैंकको ऐनअनुसार गभर्नरको नियुक्ति कार्यकाल सकिनु एक महिना अगावै गरिनुपर्ने भए पनि यसपटक ढिलाइ हुँदा आलोचना भइरहेका थिए।
अब पौडेलको नियुक्तिसँगै राष्ट्र बैंकको नीति तथा कार्यान्वयनमा स्थायित्व आउने अपेक्षा गरिएको छ।
